Fréttir Greiningar
Vikan: Laun og íbúðaverð
16.09.2013 12:00
Nokkrir áhugaverðir hagvísar munu líta dagsins ljós nú í vikunni sem flestir hverjir lúta að þróun ágústmánaðar. Má hér nefna vísitölur launa og kaupmáttar sem Hagstofa Íslands birtir mánaðarlega. Þar að auki mun Þjóðskrá Íslands birta vísitölu íbúðaverðs á höfuðborgarsvæðinu, en hún verður birt á morgun.
Talsverð verðhækkun á íbúðamarkaði
Í júlí síðastliðnum hækkaði íbúðaverð á höfuðborgarsvæðinu um 0,7% frá fyrri mánuði samkvæmt tölum Þjóðskrár. Þetta var fjórði mánuðurinn í röð sem dágóð hækkun átti sér stað á íbúðaverði á höfuðborgarsvæðinu á milli mánaða, sem að þessu sinni mátti einna helst rekja til 1,6% hækkun á verði sérbýlis á sama tíma og verð íbúða í fjölbýli hækkaði um 0,3%.
Þrátt fyrir ágætis hækkun íbúðaverðs í júlímánuði dró aðeins úr 12 mánaða takti vísitölunnar frá fyrri mánuði, eða úr 6,9% í 6,7%. Sömu sögu var að segja um þróun íbúðaverðs að raunvirði. Í júlí síðastliðnum nam hækkunin yfir síðustu 12 mánuði 2,7%, en hafði verið komin upp í 3,5% í júní. Við teljum góðar líkur á að 12 mánaða taktur vísitölunnar hafi hækkað að nýju í ágúst, þar sem vísitalan lækkaði um 0,2% í ágúst í fyrra.
Horfur á rýrnun kaupmáttar næstu mánuði
Hagstofan mun birta launavísitölu sína fyrir ágústmánuð á föstudag. Í júlí síðastliðnum lækkaði launavísitalan um 0,1% frá fyrri mánuði, og var það í fyrsta skipti frá því í apríl síðastliðnum sem það gerist. Dró aðeins úr 12 mánaða hækkunartakti launavísitölunnar á milli júní og júlí, eða úr 5,7% í 5,5%.
Þrátt fyrir lækkun launavísitölunnar í júlí síðastliðnum jókst kaupmáttur launa um 0,2% í mánuðinum, enda hafði vísitala neysluverðs (VNV) lækkað um 0,3% í júlí. Þó dró talsvert úr 12 mánaða takti vísitölunnar á milli júní og júlí, eða úr 2,3% hækkun í 1,6%, enda jókst kaupmáttur launa um 0,8% í júlí í fyrra. Aukinn kaupmáttur launa í júlímánuði er þó ávallt skammgóður vermir enda eru það útsölurnar sem drífa lækkun VNV í júlí, sem ganga svo til baka í ágúst og september.
Horfur eru á að VNV hækki nokkuð hraðar en launavísitalan það sem eftir lifir árs. VNV hækkaði um 0,3% í ágúst síðastliðnum, og miðað við nýjustu verðbólguspá okkar reiknum við með að VNV hækki samanlagt um 1,3% til frá september til áramóta. Frá ágúst til áramóta reiknum við með að launavísitalan hækki um tæpt 1%. Gangi spá okkar eftir mun kaupmáttaraukning launa yfir árið nema 1,0%. Þetta veltur þó vitaskuld á því hvenær nýir kjarasamningar, sem væntanlega líta dagsins ljós á síðasta fjórðungi ársins, taka gildi.
Dags.
|
Efni
|
Heimild
|
16.sep.13
|
Efnahagsyfirlit tryggingafélaga í lok ágúst 2013
|
Seðlabanki Íslands
|
17.sep.13
|
Fiskafli í ágúst 2013
|
Hagstofa Íslands
|
17.sep.13
|
Samræmd vísitala neysluverðs í ágúst 2013
|
Hagstofa Íslands
|
17.sep.13
|
Vísitala íbúðaverðs á höfuðborgarsvæðinu í ágúst 2013
|
Þjóðskrá Íslands
|
18.sep.13
|
Upplýsingar um leiguverð íbúðarhúsnæðis í ágúst 2013
|
Þjóðskrá Íslands
|
19.sep.13
|
Verðmæti sjávarafla janúar-júní 2013
|
Hagstofa Íslands
|
19.sep.13
|
Velta skv. virðisaukaskattsskýrslum janúar til júní 2013
|
Hagstofa Íslands
|
20.sep.13
|
Vísitala lífeyrisskuldbindinga í ágúst 2013
|
Hagstofa Íslands
|
20.sep.13
|
Mánaðarleg launavísitala í ágúst 2013
|
Hagstofa Íslands
|
20.sep.13
|
Vísitala kaupmáttar launa í ágúst 2013
|
Hagstofa Íslands
|
20.sep.13
|
Greiðslujöfnunarvísitala í október 2013
|
Hagstofa Íslands
|
20.sep.13
|
Vísitala byggingarkostnaðar fyrir október 2013
|
Hagstofa Íslands
|
20.sep.13
|
Útboð ríkisbréfa
|
Lánamál ríkisins
|