Islandsbanki hf. : Flokkar sértryggðra skuldabréfa stækkaðir

Íslandsbanki hf. hefur í dag lokið útboði á útistandandi flokkum óverðtryggðra sértryggðra skuldabréfa sem skráðir eru á NASDAQ OMX Iceland. ISLA CB 15 var stækkaður um 780.000.000 kr. á ávöxtunarkröfunni 6,40% en ISLA CB 16 um 120.000.000 kr. á ávöxtunarkröfunni 6,40%. Nýr fimm ára óverðtryggður flokkur, ISLA CB 19, var einnig boðinn út í dag og seldust þar 540.000.000 kr. á ávöxtunarkröfunni 7,05%.

Heildarstærð ISLA CB 15 útgáfunnar er nú orðin 3,92 ma. kr. og ISLA CB 16 er orðin 2,47 ma. kr. Alls hefur Íslandsbanki gefið út sex flokka sértryggðra skuldabréfa samtals að upphæð 27,37 ma. kr. frá fyrstu útgáfu bankans á slíkum bréfum í desember 2011.

Bréfin voru seld til breiðs hóps fagfjárfesta. Heildareftirspurnin í útboðinu var 1,98 ma. kr., en 73% tilboða var tekið. Stefnt er á að bréfin verði tekin til viðskipta í NASDAQ OMX Iceland þann 11. apríl næstkomandi. Viðskiptavakt fyrir alla flokka sértryggðra skuldabréf Íslandsbanka er á vegum MP banka.

Bréfin eru gefin út í samræmi við lög nr. 11 frá 2008 um sértryggð skuldabréf þar sem strangar kröfur eru gerðar til útgefenda. Tryggingasafnið að baki skuldabréfunum skal standast sérstök vikuleg álagspróf með tilliti til vaxta og gengis gjaldmiðla. Þá hefur Fjármálaeftirlitið sérstakt eftirlit með útgáfunum, sem einnig tilnefnir sjálfstæðan skoðunarmann til að sinna eftirliti. Skýrslur um tryggingasafnið að baki sértryggðu skuldabréfunum eru gefnar út ársfjórðungslega og má finna á vef Íslandsbanka.

Til baka