Áhættuflokkun

Sjóðir Íslandssjóða eru flokkaðir eftir því hversu miklar sveiflur eiga sér stað í ávöxtun þeirra. Flokkunin byggir á áhættumælikvarða sem grundvallast af leiðbeiningum Evrópsku verðbréfaeftirlitsstofnunarinnar (e. ESMA) og Fjármálaeftirlitsins. Áhættumælikvarðinn er byggður á sveiflum í vikulegri ávöxtun síðustu fimm ára af líftíma sjóðsins. Sveiflur í ávöxtun eru reiknaðar sem staðalfrávik á ársgrundvelli og gefa vísbendingu um áhættustig sjóðsins. Neðri og efri mörk í töflunni hér að neðan gefa til kynna á hvaða bili staðalfrávik sveiflna í ávöxtun viðkomandi sjóðs lendir. Flokkur 1 endurspeglar þannig minnstu sveiflur í ávöxtun og þar með minnstu áhættuna en flokkur 7 þá mestu.

Mælikvarðinn byggir á sögulegri ávöxtun og því er vert að benda á að sveiflur í ávöxtun í fortíð gefa ekki áreiðanlega vísbendingu eða tryggingu fyrir sveiflum í ávöxtun í framtíð. Ef breytingar verða á áhættu- og ávöxtunarsniði sjóðs er mælikvarðinn endurskoðaður og flokkunin getur breyst.

Áhættumælikvarðinn nær ekki yfir alla þá áhættuþætti sem fylgja fjárfestingum í sjóðum. Hann er einungis tölfræðileg lýsing á einum þessara þátta þ.e. sveiflum í ávöxtun sjóða. Hægt er að nálgast frekari umfjöllun um áhættu hér sem og í útboðslýsingum sjóða.