Stefna Íslandsbanka í samfélagslegri ábyrgð
Íslandsbanki hefur frá árinu 2010 verið aðili að alþjóðlegum sáttmála Sameinuðu þjóðanna um samfélagsábyrgð, UN Global Compact og hefur birt árlega samfélagsskýrslur (COP) sem byggjast á nálgun sáttmálans.
Ákveðið var að leggja enn frekari áherslu á samfélagsábyrgð árið 2013 með því að kortleggja samfélagsverkefni bankans. Í framhaldinu var ákveðið að samfélagsábyrgð yrði ein af þremur stefnuáherslum hans og ný stefna mótuð um málaflokkinn.
Hin nýja stefna Íslandsbanka í samfélagsábyrgð var kynnt 2015 og var samfélagsskýrsla bankans fyrir 2014 sú fyrsta þar sem stuðst var við viðmið Global Reporting Initiative, GRI. Skýrslan er því í samræmi við kjarnaskilyrði GRI G4.
Fimm meginstoðir stefnu Íslandsbanka í samfélagsábyrgð:
Viðskipti: Íslandsbanki leggur áherslu á góða stjórnarhætti og hagkvæmni. Bankinn leitast við að þjóna viðskiptavinum sínum með því að hafa skýrt regluverk, veita gagnlegar upplýsingar og gæta jafnræðis meðal viðskiptavina.
Fræðsla: Markmið Íslandsbanka er að auka þekkingu, færni og áhuga á fjármálum með því að bjóða upp á aðgengilega og áhugaverða fræðslu um fjármál og efnahagsmál. Fræðslunni er ætlað að vekja áhuga og aðstoða fólk við að taka upplýstar ákvarðanir um eigin fjármál.
Umhverfið: Íslandsbanki leggur áherslu á að vinna í takt við umhverfið og að lágmarka þau neikvæðu áhrif sem starfsemi bankans kann að hafa á umhverfið.
Vinnustaðurinn: Ýtt er undir helgun starfsmanna með virkri þátttöku í samfélagsverkefnum, vellíðan á vinnustað og markvissri fræðslu. Markmið Íslandsbanka er að ráða, efla og halda í hæfileikaríkt og ábyrgt starfsfólk.
Samfélagið: Íslandsbanki leggur sitt af mörkum til að efla nærumhverfi sitt með því að styðja við félags-, menningar- og íþróttastarf auk þess að styrkja nýsköpunar- og frumkvöðlaverkefni. Stuðningur er bæði í formi þátttöku starfsmanna og beins fjárstuðnings við valin verkefni.
Ákveðið var að fara af stað með níu lykilverkefni, valin af framkvæmdastjórn bankans, þegar ný stefna í samfélagsábyrgð var kynnt:
- Ábyrg lánastarfsemi
- Upplýsingaöryggi
- Ábyrg innkaupastefna
- Samgöngustefna
- Jafnréttisstefna
- Fræðsla til viðskiptavina
- Stefna um ábyrgar fjárfestingar
- Hjálparhönd Íslandsbanka
- Mótun skýrrar styrkjastefnu
Öll verkefnin eru vel á veg komin og sum eru þannig í eðli sínu að þau eru í stöðugri þróun. Sérstök áhersla hefur verið lögð á Hjálparhönd þar sem starfsfólki gefst kostur á að verja einum vinnudegi eða fleirum á ári í þágu góðs málefnis. Starfsfólk velur málefnið sjálft.