Íslenskur íbúðamarkaður
Greining Íslandsbanka hefur tekið saman viðamikla skýrslu um íbúðamarkaðinn hér á landi. Í skýrslunni er m.a. farið yfir að hverju þarf að huga við íbúðakaup, hvort eigi að kaupa eða leigja, hvaða þættir hafa áhrif á íbúðaverð og hvernig íbúðaverð hefur verið að þróast.
Í skýrslunni kemur m.a. fram að við spáum því að uppsveiflan á íbúðamarkaðinum muni halda áfram á næstu misserum samhliða uppsveiflu í efnahagslífinu almennt. Mikil aukning í kaupmætti launa, fjölgun starfandi, innflutningur á vinnuafli, fjölgun ferðamanna og skortur á nýbyggingum eru meðal þeirra þátta sem þrýsta verði á íbúðarhúsnæði upp. Spáum við því að verð íbúðarhúsnæðis, sem hefur verið að hækka hratt undanfarið, muni halda áfram að hækka hratt á næstu misserum. Einnig reiknum við með talsverðum vexti í fjárfestingum í íbúðarhúsnæði m.a. vegna þess að verð á íbúðarhúsnæði hefur undanfarið verið að hækka umfram byggingarkostnað.
Upptaka frá fundi
Mánudaginn 17. október var haldinn kynningarfundur um skýrsluna í Silfurbergi í Hörpu.
Ingólfur Bender
forstöðumaður Greiningar Íslandsbanka
Hvert er íbúðamarkaðurinn að fara?
Elvar Orri Hreinsson
sérfræðingur í Greiningu Íslandsbanka
Hvernig hefur íbúðaverð verið að þróast?
Hildur Kristín Þorbjörnsdóttir
viðskiptastjóri hjá Íslandsbanka
Að hverju þarf að huga við íbúðakaup?
Íbúðarmarkaður í uppsveiflu
Hér má sjá í heild sinni upptöku af kynningarfundi sem haldinn var í tilefni af útgáfu Greiningar Íslandsbanka á skýrslu um íbúðamarkaðinn. Fundurinn var haldinn í Hörpu mánudaginn þann 17. október
Ingólfur Bender
forstöðumaður Greiningar Íslandsbanka
Elvar Orri Hreinsson
sérfræðingur í Greiningu Íslandsbanka
Hildur Kristín Þorbjörnsdóttir
viðskiptastjóri hjá Íslandsbanka
Áhugaverðar staðreyndir úr skýrslunni
Nokkrir molar úr skýrslunni
- Við spáum því að verð íbúðarhúsnæðis hækki um 9,3% í ár, 11,4% á næsta ári og um 6,6% á árinu 2018.
- Um 3.000 íbúðir í byggingu á höfuðborgarsvæðinu um þessar mundir og er gert ráð fyrir að tæplega 8.000 íbúðir verði fullbyggðar á höfuðborgarsvæðinu á árunum 2016-2019.
- Lýðfræðileg þróun hefur m.a. gert það að verkum að þörf á smáum íbúðum hefur að öllum líkindum aldrei verið meiri en nú.
- Mælikvarðar um verðbólu gefa ekki til kynna að um sé að ræða slíkt ástand á íbúðamarkaði á Íslandi nú. Ástand efnahagsmála gefur þó fullt tilefni til að hafa vakandi auga með þessum mælikvörðum.
- Rúmlega þrjú þúsund eignir voru skráðar til útleigu á Airbnb í ágúst 2016 í Reykjavík. Fjölgaði þeim um tæp 80% frá ágúst 2015.
- Á hverjum degi í júlí árið 2016 var ein af hverjum átta íbúðum í 101 Reykjavík í leigu til ferðamanna í gegnum Airbnb. Voru því tæp 12,5% íbúða á því svæði tileinkuð ferðamönnum.
- Hlutfallsleg aukning íbúða á árunum 2016-2019 er mest í Mosfellsbæ (25,1%) og minnst í Reykjavík (6,5%) og á Seltjarnarnesi (6,2%).
- Athyglivert er hlutfallsleg aukning íbúða yfir spátímabilið sé ekki meiri í Reykjavík en verðþróun í miðbænum og á nærliggjandi svæðum bera þess merki að þar sé þörf nýbygginga hvað mest.
- 100 fermetra íbúð á höfuðborgarsvæðinu kostar 6,9 árslaun á meðan sambærileg íbúð á Vestfjörðum kostar 1,8 árslaun.