Fréttir Greiningar
Vaxtahækkun í takti við spár
10.06.2015 10:52
Verðbólguhorfur hafa versnað vegna kjarasamninga
Losun gjaldeyrishafta kann að auka framleiðsluspennu
Hagvaxtarþróun í takti við spá bankans
Boða umtalsverða vaxtahækkun í ágúst
Nefndin boðar í yfirlýsingu sinni í morgun umtalsverða vaxtahækkun í ágúst og enn frekari hækkun á komandi misserum. Segir nefndin einsýnt að slíkt verði nauðsynlegt til að tryggja stöðugt verðlag til lengri tíma litið. Aðspurður sagði Seðlabankanstjóri á kynningarfundi vegna ákvörðunarinnar að það væri afar ólíklegt að ekki þyrfti að hækka vexti í ágúst, en hversu mikil hækkunin yrði færi m.a. eftir launaskriði næsta kastið og að hversu miklu leyti umsamdar launahækkanir fara út í verðlagið.
Miðað við yfirlýsingu nefndarinnar og það sem kom fram á kynningarfundi vegan ákvörðunarinnar virðast miklar líkur á því að nefndin muni hækka stýrivexti bankans aftur um 0,5 prósentur á næsta vaxtaákvörðunarfundi sínum 19. ágúst nk. Eru þá eftir þrír vaxtaákvörðunardagar á þessu ári, þ.e. í september, nóvember og desember, og er vel hugsanlegt að nefndin hækki vexti bankans enn frekar þá.