Talsverður vöxtur kortaveltu í október

Líkt og undanfarið var vöxtur kortaveltu í október mun hraðari utan landsteinanna en innan þeirra. Nam vöxtur í kortaveltu innanlands 3,5% en vöxtur í kortaveltu erlendis 17,2% að raunvirði milli ára. Vöxtur veltu erlendis skýrist að stórum hluta af aukningu í utanlandsferðum Íslendinga í októbermánuði frá sama tíma í fyrra, en einnig koma væntanlega til aukin kaup í erlendum netverslunum.

Eins og áður segir var vöxturinn í október heldur hraðari en verið hefur að jafnaði á árinu, þá einkum í kortaveltu innanlands. Þannig var kortavelta einstaklinga 4,7% meiri að raunvirði á fyrstu 10 mánuðum ársins en á sama tímabili í fyrra. Þar af nam vöxtur í kortaveltu innanlands 3,1% en erlendis 18,4%. 

Í nýlegri þjóðhagsspá okkar spáum við 4,5% vexti einkaneyslu í ár. Kortatölurnar það sem af er ári virðast í ágætu samræmi við þá spá, og sama má segja um aðra nýlega hagvísa á borð við smásöluveltu og innflutning neysluvara.