Veltusafn, nýr verðbréfasjóður hjá Íslandssjóðum
18.09.2009
- Hentug leið til virkar stýringar sparnaðar til skamms tíma
- Fylgir eftir velgengni Ríkissafnsins sem nú er orðið 14,5 milljarðar.
Íslandssjóðir hafa sett nýjan verðbréfasjóð á markað, Veltusafn, sem hentar vel til sparnaðar í skemmri tíma. Markmið sjóðsins er að nýta tækifæri á markaði með virkri stýringu innlána, víxla og ríkisskuldabréfa en á sama tíma að skila jafnri og stöðugri ávöxtun. Veltusafnið hefur einnig heimild til að fjárfesta að litlu leyti í víxlum fjármálastofnana og sveitarfélaga. Mikil eftirspurn hefur verið eftir ríkisvíxlum og innlánum en með Veltusafninu gefst fjárfestum kostur á að ná áhættudreifingu við fjárfestingar til skamms tíma.
Fylgir eftir velgengni Ríkissafnsins
Í desember 2008 settu Íslandssjóðir Ríkissafnið á markað og hefur sjóðnum verið mjög vel tekið af fjárfestum en í dag hafa um 1.400 aðilar fjárfest í honum fyrir 14,5 milljarða króna. Veltusafnið byggir á sömu aðferðafræði og Ríkissafnið, það er blöndun ríkisbréfa og innlána fjármálastofnana. Meginmunurinn á milli sjóðanna felst í styttri meðallíftíma eigna Veltusafnsins, það er 1 mánuður til 1 ár miðað við 1-3 ár í Ríkissafninu.
Virk stýring - betri ávöxtun
Virk stýring í Veltusafninu gerir það einnig að verkum að mögulegt er að nýta tækifæri á markaði til að ná fram betri ávöxtun til lengri tíma miðað við sparnaðarreikninga. Með fjárfestingu í sjóðnum næst góð eignadreifing milli skuldabréfa með ábyrgð ríkissjóðs og innlána fjármálastofnana. Sjóðurinn hentar bæði einstaklingum sem vilja ávaxta peninga til eins mánaðar eða lengur sem og fagfjárfestum. Hægt er að fjárfesta með stökum kaupum í sjóðnum og einnig er hægt að skrá sig í reglulega áskrift.